हेटौँडा, असार २९ — हेटौँडा–काठमाडौं जोड्ने दुई प्रमुख सडकखण्डमा सवारी आवागमन अस्थायी रूपमा बन्द गरिएको छ।
जिल्ला प्रशासन कार्यालय मकवानपुरले सोमबार सूचना जारी गर्दै हेटौँडा–ठिंगन–बागमती–ललितपुर (कान्ति लोकपथ) तथा हेटौँडा–भीमफेदी–कुलेखानी–सिस्नेरी–काठमाडौं सडकखण्डमा सवारी सञ्चालन रोकिएको जनाएको छ।
प्रमुख जिल्ला अधिकारी बसन्त अधिकारीका अनुसार यात्रुको सुरक्षा सुनिश्चित गर्न तथा सम्भावित दुर्घटना न्यूनीकरण गर्ने उद्देश्यले उक्त निर्णय गरिएको हो।
प्रशासनले कान्ति लोकपथ प्रयोग गर्ने सवारीसाधनलाई मकवानपुरको चौघडामा तथा हेटौँडा–कुलेखानी सडक प्रयोग गर्ने सवारीलाई चौकीटोलमा रोक्ने व्यवस्था गरिएको जनाएको छ।
सूचनाअनुसार कान्ति लोकपथमा असार २९ गते साँझ ५ बजेदेखि अर्को सूचना जारी नभएसम्म सवारी सञ्चालन बन्द रहनेछ।
त्यस्तै, हेटौँडा–भीमफेदी–कुलेखानी–सिस्नेरी–काठमाडौं सडकखण्डमा सोमबार साँझ ५ बजेदेखि असार ३० गते बिहान ५ बजेसम्म सवारी आवागमन पूर्ण रूपमा रोक लगाइएको छ।
जिल्ला प्रशासन कार्यालयले यातायात व्यवसायी, चालक तथा यात्रुलाई तोकिएको स्थानभन्दा अगाडि सवारीसाधन नलैजान र सुरक्षित स्थानमा बस्न आग्रह गरेको छ।
