हेटौँडा । राष्ट्रिय परीक्षा बोर्ड, परीक्षा नियन्त्रण कार्यालय, कक्षा १२ अन्तर्गत हेटौँडा कार्यालयको कार्यक्षेत्रमा पर्ने पाँच जिल्लामा सञ्चालित कक्षा १२ को मौका परीक्षा शान्तिपूर्ण र व्यवस्थित रूपमा सम्पन्न भएको छ।
कार्यालयका अनुसार २०८३ साल श्रावण २ र ३ गते सञ्चालन भएको परीक्षामा पहिलो दिन ८ हजार ३८ परीक्षार्थीमध्ये ७ हजार ६४५ जना सहभागी भएका थिए। त्यस्तै दोस्रो दिन २ हजार ६८३ परीक्षार्थीमध्ये २ हजार ५६६ जनाले परीक्षा दिएका छन्।
पाँच जिल्लाका २४ वटा परीक्षा केन्द्रमार्फत सञ्चालन गरिएको परीक्षालाई व्यवस्थित, मर्यादित र निष्पक्ष बनाउन शिक्षा विकास तथा समन्वय इकाई, केन्द्राध्यक्ष, जिल्ला परीक्षा समन्वय समिति तथा सुरक्षा निकायले आवश्यक समन्वय, सहजीकरण र व्यवस्थापनमा महत्वपूर्ण भूमिका निर्वाह गरेका थिए।
परीक्षा सफलतापूर्वक सम्पन्न गराउन सहयोग पुर्याउने सबै निकायप्रति हेटौँडा कार्यालयले हार्दिक कृतज्ञता व्यक्त गर्दै आगामी दिनमा पनि यस्तै सहयोग र समन्वयको अपेक्षा गरेको जनाएको छ।
