जिल्ला प्रशासन कार्यालय मकवानपुरले जिल्लाभित्र सञ्चालित सबै मासु व्यवसायीलाई सरसफाइ, गुणस्तर र उपभोक्ता सुरक्षासम्बन्धी मापदण्डको पूर्ण पालना गर्न आग्रह गरेको छ।
शुक्रबार प्रमुख जिल्ला अधिकारी तीर्थराज जोशीद्वारा जारी सूचनामा केही मासु पसलहरूले सरसफाइमा लापरबाही गरेको, स्वच्छ तथा स्वास्थ्यकर मासु बिक्री–वितरण नगरेको र सरकारले तोकेको न्यूनतम मापदण्डसमेत पालना नगरेको भन्दै उपभोक्ताबाट गुनासो प्राप्त भएकाले यस्तो निर्देशन जारी गरिएको उल्लेख छ।
प्रशासनले सम्बन्धित निकायबाट अनुमति तथा दर्ता लिएर मात्र व्यवसाय सञ्चालन गर्न, पशु बधशालाको उचित व्यवस्थापन गर्न, रोगी, शंकास्पद वा प्राकृतिक रूपमा मरेका पशुको मासु बिक्री नगर्न, आवश्यकताअनुसार बधपूर्व (Ante-mortem) र बधपश्चात् (Post-mortem) परीक्षण गराउन तथा मासुलाई स्वच्छ, धुलोरहित, किरारहित र प्रदूषणमुक्त वातावरणमा राख्न निर्देशन दिएको छ।
यस्तै, मासु काट्न प्रयोग हुने टेबल, चक्कु, दाउ, खुर्पी, मेसिनलगायत उपकरण दैनिक सफा गर्न, पर्याप्त स्वच्छ पानीको व्यवस्था गर्न, फोहोर तथा रगतको उचित व्यवस्थापन गर्न, पसलमा कार्यरत व्यक्तिले एप्रोन, हेडकभर, पञ्जा र बुट अनिवार्य प्रयोग गर्न तथा व्यक्तिगत सरसफाइमा विशेष ध्यान दिनुपर्ने उल्लेख गरिएको छ।
प्रशासनले खुला घाउ वा संक्रामक रोग भएका व्यक्तिले मासु काट्ने तथा बिक्री–वितरण गर्ने कार्य नगर्न, मासु पसलभित्र धूमपान, सुर्ती, गुट्खा वा मदिरा सेवन नगर्न, मासुलाई सुरक्षित तापक्रममा राख्न, पुरानो र नयाँ मासु मिसाएर बिक्री नगर्न तथा कुहिएको, दुर्गन्धित वा रङ परिवर्तन भएको मासुको बिक्री–वितरण पूर्ण रूपमा निषेध गरिएको जनाएको छ।
सूचनामा उल्लिखित मापदण्ड र कानुनी व्यवस्था पालना नगरेको पाइएमा पशु बधशाला तथा मासु जाँच ऐन, २०५५, पशु बधशाला तथा मासु जाँच नियमावली, २०५७, उपभोक्ता संरक्षण ऐन, २०७५ र उपभोक्ता संरक्षण नियमावली, २०७६ बमोजिम कारबाही गरिने चेतावनी दिइएको छ।
जिल्ला प्रशासन कार्यालयले सर्वसाधारणलाई समेत मापदण्डविपरीत सञ्चालन भएका मासु पसलबारे जानकारी तथा सूचना उपलब्ध गराई उपभोक्ता हित संरक्षणमा सहयोग गर्न अनुरोध गरेको छ।
