>
साउन २०, हेटौंडा>
विज्ञान शिक्षक समाज (स्टान) मकवानपुरद्वारा कक्षा १० का विद्यार्थीहरूका लागि विज्ञान तथा प्रविधि विषयको परियोजना तथा प्रयोगात्मक कार्य सरल र प्रभावकारी ढंगले गराउने उद्देश्यले इन्नोभेटिभ साइन्स एन्ड टेक्नोलोजी प्राक्टिकल एन्ड प्रोजेक्ट वर्क बुक सार्वजनिक गरिएको छ ।>
लामो समयदेखि शिक्षा क्षेत्रमा सक्रिय स्टान मकवानपुरका सदस्यहरूको मेहनत र अनुभवलाई समेटेर तयार गरिएको यस पुस्तकले परियोजना कार्यलाई सरल, व्यवस्थित र व्यवहारिक बनाउने लक्ष्य राखेको छ ।>
भरत पोखरेल र सुवास खनालद्वारा लिखित उक्त पुस्तकमा माध्यमिक तह कक्षा १० को पाठ्यक्रमअनुसार आवश्यक प्रयोगात्मक कार्य तथा परियोजनाहरू स्पष्ट निर्देशनसहित प्रस्तुत गरिएको छ । पुस्तकमा ३२ वटा उदाहरण र २२ वटा अभ्यास समेटिएका छन् । पुस्तकभित्रै चित्र बनाउन र लेख्न मिल्ने व्यवस्था भएकाले यसले विद्यार्थीलाई आत्मनिर्भर रूपमा कार्य गर्न सहयोग गर्ने तथा शिक्षकलाई पनि कक्षामा प्रभावकारी रूपमा प्रयोग गर्न सहज हुने लेखक भरत पोखरेलले बताउनुभयो । >
स्टान मकवानपुरको सहकार्यमा प्रसिद्धि बुक हाउसद्वारा प्रकाशित उक्त कार्यपुस्तिका विद्यार्थी तथा शिक्षक दुवैका लागि उपयोगी हुने अपेक्षा गरिएको छ। प्रकाशकका अनुसार पुस्तकको मूल्य रु. २३० निर्धारण गरिएको छ। साथै, कक्षा ८ र ९ का लागि पनि प्रयोगात्मक कार्यपुस्तिका तयारीको चरणमा रहेको जनाइएको छ ।>
यो कार्यपुस्तिकाले विज्ञान तथा प्रविधि शिक्षालाई अझ प्रयोगमुखी बनाउँदै विद्यार्थीको सिकाइ स्तर उकास्न महत्त्वपूर्ण भूमिका खेल्ने अपेक्षा गरिएको छ ।>>
धेरै राम्रो समाचार छ है।
विज्ञान तथा प्रविधी विषयको लागि उपयोगी व्यबहारिक कार्यपुस्तिका। लेखकद्वय, सम्पादक मण्डल, सल्लाहकारहरू, र पुस्तक तयारी र प्रकाशनमा योगदान गर्नुहुने सम्पूर्ण शिक्षकगणलाई बधाई तथा सफलताको शुभकामना ।