जिल्ला प्रशासन कार्यालय मकवानपुरले राष्ट्रिय परिचयपत्र सम्बन्धी सेवाग्राहीको चाप बढेकाले सार्वजनिक बिदाको दिन समेत सेवा सञ्चालन गर्ने भएको छ।
कार्यालयले जारी गरेको सूचनाअनुसार मिति २०८३ श्रावण ९ र १० गते शुक्रबार र शनिबार बिहान ७:०० बजेदेखि बेलुकी ५:०० बजेसम्म राष्ट्रिय परिचयपत्र शाखा खुला रहने छ।
पछिल्लो समय राष्ट्रिय परिचयपत्रका लागि विवरण दर्ता गर्ने, तयार भएको कार्ड लिन र विवरण संशोधन गर्न आउने सेवाग्राहीको संख्या बढ्दै गएपछि चाप कम गर्न र सहज सेवा उपलब्ध गराउन यस्तो निर्णय गरिएको कार्यालयले जनाएको छ।
प्रशासनले उक्त दुई दिन राष्ट्रिय परिचयपत्रको विवरण दर्ता, कार्ड वितरण र विवरण संशोधन लगायतका सबै सेवा प्रवाह हुने भएकाले सम्बन्धित सबैलाई जानकारी गराएको छ।
सहायक प्रमुख जिल्ला अधिकारी मोहनराज जोशीले हस्ताक्षर गर्नुभएको सूचनामा सेवाग्राहीलाई तोकिएको समयमा नै कार्यालयमा उपस्थित हुन अनुरोध गरिएको छ ।
