मकवानपुर होटल एसोसिएसनले अविरल वर्षासँगै आएको बाढी–पहिरोका कारण विभिन्न सडकखण्ड अवरुद्ध हुँदा जिल्लाभित्र रोकिएका यात्रुलाई राहतस्वरूप सदस्य होटल तथा लजहरूमा २० प्रतिशत छुट दिने निर्णय गरेको छ।
एसोसिएसनले जारी गरेको सूचनाअनुसार प्राकृतिक विपद्का कारण यात्रा गर्न नसकी मकवानपुरमा रोकिएका यात्रुले सदस्य होटल तथा लजमा उपलब्ध कोठाको शुल्कमा २० प्रतिशत छुट पाउनेछन्।
एसोसिएसनले जिल्लाका सम्पूर्ण सदस्य होटल तथा लज व्यवसायीलाई मानवीय संवेदनालाई प्राथमिकतामा राख्दै छुटसहित सुरक्षित बसोबासको व्यवस्था मिलाउन आग्रह गरेको छ। विपद्को यस कठिन परिस्थितिमा यात्रुलाई सहज र राहत महसुस गराउने उद्देश्यले यस्तो निर्णय गरिएको एसोसिएसनले जनाएको छ।
एसोसिएसनले विपद्को समयमा होटल व्यवसायीलाई सामाजिक उत्तरदायित्व निर्वाह गर्दै प्रभावित यात्रुको सहयोगमा सक्रिय हुन समेत अनुरोध गरेको छ। उक्त निर्णय तत्काल लागू हुने जनाइएको छ।
