नेपाली कांग्रेस मकवानपुर जिल्ला कार्यसमितिले ४४ औँ वी.पी. स्मृति सभा तथा जरा अभियान समापन कार्यक्रम आयोजना गर्ने भएको छ।
समितिका अनुसार कार्यक्रम साउन ६ गते बुधबार बिहान ११ बजे हेटौँडा–२ स्थित कालिका पार्टी प्यालेसमा आयोजना गरिनेछ।
कार्यक्रममार्फत नेपाली कांग्रेसका संस्थापक नेता तथा पूर्वप्रधानमन्त्री विश्वेश्वरप्रसाद (वी.पी.) कोइरालाको योगदानको स्मरण गर्दै उहाँले अघि सारेका राष्ट्रवाद, लोकतन्त्र र समाजवादका आदर्शबारे चर्चा गरिने जनाइएको छ। साथै पार्टीले सञ्चालन गरेको जरा अभियानको औपचारिक समापन पनि यही कार्यक्रममा गरिनेछ।
नेपाली कांग्रेस मकवानपुर जिल्ला कार्यसमितिले पार्टीका नेता–कार्यकर्ता, शुभेच्छुक तथा सर्वसाधारणलाई कार्यक्रममा उपस्थित भई सफल बनाउन आग्रह गरेको छ।
