साउन २, हेटौंडा
हेटौंडा–६ चौघडामा रहेको नवजीवन ज्योति क्लबको नवनिर्मित भवन उद्घाटन गरिएको छ। वागमती प्रदेश सरकार र हेटौंडा उपमहानगरपालिकाको सहयोगमा क्लबकै निजी जग्गामा निर्माण गरिएको उक्त भवनको उद्घाटन वागमती प्रदेशका मुख्यमन्त्री इन्द्रबहादुर बानियाँले शनिबार गरेका हुन्।
क्लबका अध्यक्ष राजकुमार बास्तोलाको सभाध्यक्षतामा सम्पन्न कार्यक्रममा नगर उपप्रमुख राजेश बानियाँ तथा वडा नं. ६ का कार्यवाहक अध्यक्ष विजय पौडेलको विशिष्ट आतिथ्यता रहेको थियो। कार्यक्रममा क्लबले विगतमा गरेका गतिविधिबारे संस्थागत प्रतिवेदन प्रस्तुत गरिएको थियो।
उद्घाटन समारोहमा विभिन्न राजनीतिक दलका प्रतिनिधि, सहकारी तथा सामाजिक संघसंस्थाका प्रमुख, जनप्रतिनिधि, सुरक्षाकर्मी, सञ्चारकर्मी तथा स्थानीयवासीहरूको उल्लेख्य उपस्थिति रहेको थियो।
२०५८ सालमा वातावरण संरक्षण पुरस्कारबाट सम्मानित नवजीवन ज्योति क्लबमा हाल ५० साधारण, ८५ आजीवन तथा २ मानार्थ सदस्य रहेका छन्। कार्यक्रम क्लबका सचिव राजकुमार फुयालले सञ्चालन गरेका थिए।
