हेटौँडा उपमहानगरपालिका–९ स्थित कुष्माण्ड सरोवर त्रिवेणीधाममा हरिशयनी एकादशीदेखि हरिबोधिनी एकादशीसम्म सञ्चालन हुने चारमहिने चातुर्मास व्रत विधिवत रूपमा शुभारम्भ भएको छ।
चातुर्मास अवधिभर प्रत्येक दिन बिहान ५:३० बजेदेखि पूजा, हवन, आरती तथा पुष्पाञ्जलि कार्यक्रम सञ्चालन हुने आयोजकले जनाएको छ। त्यसपछि बिहान ७:०० बजेदेखि श्रीमद् विष्णु पुराण पाठपारायण तथा कथा प्रवचन नियमित रूपमा सञ्चालन गरिनेछ।
धार्मिक आस्था, आध्यात्मिक साधना तथा सनातन संस्कृतिको संरक्षण र प्रवर्द्धन गर्ने उद्देश्यले आयोजना गरिएको चातुर्मास कार्यक्रममा सहभागी भई पुण्यलाभ गर्न आयोजकले सम्पूर्ण श्रद्धालु भक्तजनमा हार्दिक निमन्त्रणा गरेको छ।
चार महिनासम्म निरन्तर सञ्चालन हुने यस धार्मिक अनुष्ठानमा दैनिक पूजा–आराधना, पुराण वाचन र कथा श्रवणमार्फत भक्तजनलाई आध्यात्मिक लाभ प्राप्त हुने विश्वास गरिएको छ। आयोजकले इच्छुक सबै भक्तजनलाई कुष्माण्ड सरोवर त्रिवेणीधाममा उपस्थित भई धार्मिक कार्यक्रममा सहभागी हुन आग्रह गरेको छ।
