मकवानपुर क्षेत्र नं. १ का प्रतिनिधिसभा सदस्य प्रकाश गौतम ले हेटौँडा उपमहानगरपालिकाका विभिन्न वडामा पुगेर स्थानीय नागरिकसँग प्रत्यक्ष भेटघाट तथा जनगुनासो सुन्ने अभियानलाई निरन्तरता दिएका छन्।
हेटौँडा उपमहानगरपालिकाको वडा नं. ४, ७ र १२ मा आयोजित कार्यक्रममा सांसद गौतमले स्थानीयवासीका समस्या, सुझाव र गुनासाहरू प्रत्यक्ष रूपमा सुनेका हुन्। कार्यक्रममा उठाइएका विषयलाई सम्बन्धित निकायसम्म पुर्याई समाधानका लागि आवश्यक पहल गरिने प्रतिबद्धता जनाउँदै आवश्यक प्रतिवेदन तथा समन्वय प्रक्रिया अगाडि बढाइएको जानकारी दिइएको छ।
कार्यक्रममा स्थानीय आवश्यकता र जनचासोका विषयलाई नजिकबाट बुझेर विकास निर्माण, सेवा प्रवाह तथा सार्वजनिक सरोकारका मुद्दालाई प्राथमिकताका साथ सम्बोधन गर्ने उद्देश्य रहेको सांसद गौतमले बताएका छन्। जनप्रतिनिधि र नागरिकबीचको प्रत्यक्ष संवादले उत्तरदायी शासन तथा प्रभावकारी सेवा प्रवाहमा टेवा पुग्ने विश्वास पनि व्यक्त गरिएको छ।
कार्यक्रमलाई प्रभावकारी र व्यवस्थित बनाउन सांसद गौतमका सचिवालय प्रमुख किशोर अर्याल, राष्ट्रिय स्वतन्त्र पार्टी मकवानपुरका जिल्ला उपसभापति टाकाराज थापा, सुरेश थापा तथा क्षेत्र नं. १ का सभापति हरिहर खतिवडा लगायतको सक्रिय सहभागिता रहेको थियो।
कार्यक्रममा सहभागी स्थानीयवासीहरूले आफ्ना समस्या प्रत्यक्ष रूपमा राख्न पाएकोमा खुसी व्यक्त गर्दै यस्ता जनमुखी संवाद कार्यक्रमलाई आगामी दिनमा पनि निरन्तर सञ्चालन गर्न आग्रह गरेका छन्।
