मकवानपुरको बागमती गाउँपालिकाले आफ्नो क्षेत्रभित्र सञ्चालनमा रहेका सबै व्यापार, व्यवसाय, उद्योग, प्राइभेट फर्म, होटल तथा पसललगायतका व्यवसाय अनिवार्य रूपमा दर्ता तथा वार्षिक नवीकरण गर्न सूचना जारी गरेको छ। गाउँपालिकाले चालु आर्थिक वर्ष २०८३/०८४ का लागि व्यवसाय दर्ता र नवीकरणको प्रक्रिया समयमै पूरा गर्न सम्बन्धित सबै व्यवसायीलाई आग्रह गरेको हो। 

प्रमुख प्रशासकीय अधिकृत ओमबहादुर दर्जीद्वारा हस्ताक्षरित सूचनाअनुसार हालसम्म दर्ता नभएका व्यवसायले पनि आवश्यक कागजातसहित चालु आर्थिक वर्षको असोज मसान्तभित्र व्यवसाय दर्ता गरिसक्नुपर्ने उल्लेख छ। साथै, तोकिएको समयभित्र दर्ता वा नवीकरण नगरे प्रचलित कानुनबमोजिम कारबाही गरिने चेतावनी समेत दिइएको छ। 

सूचनामा नयाँ व्यवसाय दर्ताका लागि निवेदन, वडा कार्यालयको सिफारिस, नागरिकता, जग्गा वा घरबहालसम्बन्धी कागजात, कर तिरेको रसिद, पासपोर्ट साइजका फोटो लगायत आवश्यक कागजात पेश गर्नुपर्ने उल्लेख गरिएको छ। यस्तै, नवीकरणका लागि व्यवसाय दर्ता प्रमाणपत्रको सक्कल, अघिल्लो आर्थिक वर्षको कर चुक्ताको प्रमाण, प्यान (PAN) को प्रतिलिपि तथा नागरिकताको प्रतिलिपि आवश्यक पर्ने जनाइएको छ। 

गाउँपालिकाले पूर्ण रूपमा बन्द भइसकेका व्यवसायको हकमा समेत असोज मसान्तभित्र नियमानुसार व्यवसाय बन्द (लगत कट्टा) गराउन निवेदन दिन आग्रह गर्दै अन्यथा करको दायित्व कायम रहने जनाएको छ।