बागमती प्रदेश सरकार, सहकारी तथा गरिबी निवारण मन्त्रालय अन्तर्गतको समस्याग्रस्त सहकारी व्यवस्थापन समितिको कार्यालयले प्रदेश भित्रका ५ वटा समस्याग्रस्त बचत तथा ऋण सहकारी संस्थाका साना बचतकर्ताहरूको बचत रकम फिर्ता गर्ने कार्य २०८३ असार ३० गते मङ्गलवारदेखि सुरु गर्न लागेको छ।
सोमबार सूचना अधिकारी सुवास उप्रेतीद्वारा जारी प्रेस नोट अनुसार, बागमती प्रदेशका माननीय मुख्यमन्त्री इन्द्रबहादुर बानियाँज्यूले ललितपुरको जावलाखेलस्थित बागमती प्रदेश सुशासन केन्द्रको सभाहलमा अपराह्न १:०० बजे एक कार्यक्रमका बीच यस कार्यको शुभारम्भ गर्नुहुनेछ। हालसम्म समस्याग्रस्त घोषित सिभिल बचत तथा ऋण सहकारी संस्था (सोल्टीमोड), दर्शन बचत तथा ऋण सहकारी संस्था (कीर्तिपुर), सुमेरु बचत तथा ऋण सहकारी संस्था (पुल्चोक), नेशनल नमोबुद्ध बचत तथा ऋण सहकारी संस्था (सामाखुसी) र लालीगुँरास बचत तथा ऋण सहकारी संस्था (खुसिबु) का साना बचतकर्ताहरूले यस चरणमा अधिकतम रु. १ लाखसम्मको आफ्नो बचत रकम फिर्ता पाउनेछन्।
