नेपाल शिक्षक महासंघ, राष्ट्रिय समितिले आगामी भदौ ५ गतेदेखि प्रदर्शनमा ल्याउन लागिएको नेपाली चलचित्र ‘मास्टर्नी’ को प्रचार सामग्री अन्तर्गत सार्वजनिक गरिएको गीतप्रति गम्भीर आपत्ति जनाएको छ। महासंघले विज्ञप्ति जारी गर्दै उक्त गीतमा महिला शिक्षकप्रति लक्षित अपमानजनक शब्द र भाव प्रयोग गरिएको आरोप लगाएको हो।
विज्ञप्तिमा भनिएको छ कि उक्त गीतले शिक्षक तथा शिक्षण पेशाको गरिमामाथि गम्भीर प्रहार गरेको ठहर गर्दै यसलाई तुरुन्त बन्द गर्न र चलचित्रमा प्रयोग नगर्न सम्बन्धित पक्षसँग आग्रह गरिएको छ। महासंघले यस्ता सामग्रीले समाजमा नकारात्मक सन्देश फैलाउने भन्दै यसको निरन्तर प्रसारणले असहज परिस्थिति सिर्जना हुन सक्ने चेतावनी दिएको छ।
महासंघले चलचित्र निर्माता तथा सम्बन्धित कलाकारहरूलाई सामाजिक जिम्मेवारी बहन गर्न आग्रह गर्दै सम्भावित परिणामप्रति सचेत रहन समेत ध्यानाकर्षण गराएको छ।महासचिव तुला बहादुर थापा र अध्यक्ष लक्ष्मी किशोर सुवेदीद्वारा हस्ताक्षरित उक्त विज्ञप्ति साउन १ गते जारी गरिएको हो।
