हेटौंडा उपमहानगरपालिका–९ वडा कार्यालयले सामाजिक सुरक्षा भत्ता प्राप्त गरिरहेका लाभग्राहीहरूलाई आर्थिक वर्ष २०८३/८४ का लागि वार्षिक नवीकरण गर्न अनुरोध गरेको छ।
वडा कार्यालयले जारी गरेको सूचनाअनुसार ज्येष्ठ नागरिक, दलित ज्येष्ठ नागरिक, एकल महिला, विधवा, पूर्ण अपाङ्गता, अति अशक्त अपाङ्गता तथा दलित बालबालिका गरी सामाजिक सुरक्षा भत्ता प्राप्त गर्ने सबै लाभग्राहीले आवश्यक कागजातसहित वडा कार्यालयमा उपस्थित भई नवीकरण गराउनुपर्नेछ।
सूचनामा सामाजिक सुरक्षा भत्ता नवीकरण अवधि साउन १ गतेदेखि असोज मसान्तसम्म कायम रहने उल्लेख गरिएको छ।
नवीकरणका लागि लाभग्राहीले नागरिकताको प्रतिलिपि, सामाजिक सुरक्षा भत्ता परिचयपत्र, राष्ट्रिय परिचयपत्र तथा अपाङ्गता भएका व्यक्तिको हकमा अपाङ्गता परिचयपत्र अनिवार्य रूपमा पेश गर्नुपर्ने वडा कार्यालयले जनाएको छ।
वडा कार्यालयले तोकिएको अवधिभित्र नवीकरण प्रक्रिया पूरा गरी सामाजिक सुरक्षा भत्ता सेवामा निरन्तरता सुनिश्चित गर्न सम्पूर्ण लाभग्राहीलाई आग्रह गरेको छ।
