ड्रिम्स म्युजिक स्कुलको आयोजनामा सञ्चालन भइरहेको प्रतिष्ठित रियालिटी शो 'डान्स मेरो मनको जुनियर सिजन वान' को फाइनल राउन्डमा प्रगति माविकी छात्रा अप्सना थिङ पुग्न सफल भएकी छिन् । देशभरिका कुल ५२१ जना प्रतिस्पर्धीहरूलाई पछि पार्दै विभिन्न चरण पार गरेर अन्तिम २१ मा स्थान बनाउन उनी सफल भएकी हुन् ।
प्रतिभाशाली प्रगतिको कदर गर्दै ड्रिम्स म्युजिक स्कुलले आज प्रगति माविमै विशेष प्रस्तुति कार्यक्रमको आयोजना गरेको थियो । उक्त कार्यक्रममा अप्सना थिङले तीनवटा फरक-फरक गीतहरूमा आफ्नो उत्कृष्ट नृत्य कला प्रदर्शन गरेकी थिइन् ।
आयोजक टिम हाल फाइनलमा पुग्न सफल भएका विद्यार्थीहरूको विद्यालयमै पुगेर नवप्रतिभाहरूलाई प्रोत्साहन गर्ने र उनीहरूको पक्षमा भोट माग्ने अभियानमा जुटेको छ । सोही अभियान अन्तर्गत विद्यालयमै कार्यक्रम गरी अप्सनालाई भोटिङमार्फत विजयी गराउन आयोजक तथा विद्यालयले संयुक्त रूपमा सम्पूर्णमा आह्वान समेत गरेको छ ।
आयोजकका अनुसार यस प्रतियोगिताको अन्तिम तथा निर्णायक प्रतिस्पर्धा आगामी साउन १ गते ओम्याक्स हलमा भव्य रूपमा आयोजना हुनेछ ।
