हेटौंडा ९ स्थित कुष्माण्ड सरोवर त्रिवेणीधाममा आगामी भदौ १ गते नागपञ्चमीका अवसरमा विशेष नवग्रह तथा कालसर्प दोष निवारण पूजा आयोजना गरिने भएको छ।
धामले सार्वजनिक गरेको सूचनाअनुसार भक्तजनहरूको ग्रहशान्तिका लागि वि.सं. २०६८ सालदेखि नियमित रूपमा नवग्रह तथा कालसर्प दोष निवारण पूजा सञ्चालन हुँदै आएको छ। सोही परम्पराअनुसार यस वर्ष पनि नागपञ्चमीका दिन वर्षमा एकपटक विशेष पूजा गरिने जनाइएको छ।
पूजामा सहभागी हुन इच्छुक भक्तजनलाई आवश्यक पूजा सामग्रीको व्यवस्थापनका लागि साउन २२ गतेभित्र धाममा सम्पर्क गरी नाम दर्ता गराउन आग्रह गरिएको छ। भक्तजनको यकिन संख्या नभएसम्म पूजा सामग्री जुटाउन कठिन हुने भएकाले समयमै सम्पर्क गर्न धाम व्यवस्थापनले अनुरोध गरेको छ।
धार्मिक विश्वासअनुसार नागपञ्चमीका दिन गरिने नवग्रह तथा कालसर्प दोष निवारण पूजा विशेष फलदायी मानिने भएकाले यस वर्ष पनि ठूलो संख्यामा श्रद्धालुको सहभागिता रहने अपेक्षा गरिएको त्रिवेणीधाम विकास समितिका अध्यक्ष ईश्वरी प्रसाद न्यौपानेले बताउनुभयो ।
