मकवानपुरको बकैया गाउँपालिकाका विद्यालयहरूमा स्थानीय पाठ्यक्रम अन्तर्गत तामाङ भाषा पढाउने विषयमा छलफल सुरु भएको छ ।
आगामी शैक्षिक सत्रदेखि गाउँपालिकाका सबै विद्यालयहरूमा तामाङ भाषा अनिवार्य गर्ने लक्ष्यका साथ छलफल प्रक्रिया अगाडि बढाइएको बकैया गाउँपालिकाका तामाङ भाषा समितिका अध्यक्ष जितबहादुर तामाङले बताउनुभयो ।
समिति अध्यक्ष तामाङको अध्यक्षतामा भएको कार्यक्रममा बकैया गाउँपालिकाका विभिन्न वडाका वडाध्यक्षहरूको सहभागिता रहेको थियो । तामाङ भाषा पुस्तककका लेखक तथा प्रशिक्षक सिंहबहादुर योञ्जनले कार्यक्रममा प्रशिक्षण दिनुभएको थियो ।
कक्षा ८ सम्म स्थानीय विषयअन्तर्गत मातृभाषाको पाठ्यक्रम समावेश गर्न पाइने राष्ट्रिय पाठ्यक्रम प्रारुपले व्यवस्था गरेको छ । सोही व्यवस्था अनुसार विभिन्न पालिकाहरूले पाठ्यक्रम बनाएर लागू गरिरहेका छन् । हेटौँडा उपमहानगरपालिकाले हाम्रो हेटौँडा शीर्षकको पाठ्यक्रम बनाएर विद्यालयहरूमा लागू गराएको छ ।
