कुष्माण्ड सरोवर त्रिवेणी धाममा हरेक वर्ष लाग्ने एक महिने मकर मेला अहिले लोकप्रिय हुँदै गइरहेको छ । विगतका वर्षहरूको तुलनामा यस वर्षको मकर मेलामा देशका विभिन्न भागबाट दर्शनार्थीहरूको बाक्लो उपस्थिति रहेको त्रिवेणी धाम विकास समितिका अध्यक्ष ईश्वरीप्रसाद न्यौपानेले बताउनुभयो ।
यस वर्षको मेलामा चितवन, नवलपरासी, गोर्खा, बारा, पर्सा, रौतहट,काठमाडौँलगायतका जिल्लाहरूबाट दर्शनार्थीहरू दर्शनका लागि आएका थिए ।
पौष मसान्तबाट सुरु भई माघ मसान्तसम्म चलेको मेलामा करिब १ लाख ५० हजार भक्तजनहरूले दर्शन गरेका छन् । कुष्माण्ड सरोवर, पार्क तथा शिशमहलको अवलोकनका लागि ५१ हजारभन्दा बढीले टिकट काटेर प्रवेश गरेका थिए । सोही अवधिमा अन्य हजारौँ दर्शनार्थीहरूले पनि निःशुल्क सो स्थानको अवलोकन गरेका थिए । यस धाममा शिशमहल अवलोकनका लागि भने शुल्कको व्यवस्था गरिएको छ ।
माघ महिनाभर श्रीमद्भागवत महापुराण, सामूहिक व्रतबन्ध तथा एक सय आठ गौमुखी धारामा स्नान गर्नका लागि भक्तजनहरू आएका थिए । यस वर्षको माघ महिनामा मात्र १२६ जनाको समूहिक व्रतबन्ध गरिएको छ ।
यसैगरी शिशमहल, कुष्माण्ड सरोवर पार्क लगायतका क्षेत्रको अवलोकनका लागि पनि अहिले दर्शनार्थीहरू आउने क्रम बढ्दै गइरहेको छ । विगतका तुलनामा अहिले प्रचारप्रसार भएका कारण पनि दर्शनार्थीहरू आउनेक्रम बढेको त्रिवेणी धाम विकास समितिले जानकारी दिएको छ ।
यस वर्षको एक महिनासम्म चलेको मेलामा हेटौँडा उपमहानगरपालिका वडा नम्बर ९ का विभिन्न टोलविकास समितिहरूले सहयोग गरेका थिए । विगतका वर्षहरूदेखि नै टोल विकास समतिले पालैपालो मेलामा सहयोग गर्दै आइरहेका छन् । भक्तजनहरूलाई प्रसादी वितरण गर्ने तथा मेलाका लागि अन्य आवश्यक सबै प्रकारका सहयोग टोल विकास समितिहरूले गरेको समितिका अध्यक्ष न्यौपानेले बताउनुभयो ।
समितिका अध्यक्ष न्यौपानेले एक महिनाभर मेलामा खट्नुहुने कार्यसमितिका पदाधिकारी, गुरु पण्डितज्यूहरू, भजन गाउनुहुने कलाकर्मीहरू तथा टोल विकास समितिहरूलाई धन्यवाद दिनुभएको छ ।
यस धार्मिक तथा पर्यटकीय क्षेत्रमा अहिले मोनो रेलसहितको बाल उद्यान निर्माणको क्रममा रहेको छ भने निकट भविष्यमै वेदविद्यालय पनि सञ्चालन गर्ने समितिको योजना रहेको छ ।
