नेकपा एमाले बागमती प्रदेशको प्रथम अधिवेशन आजबाट सुरु भएको छ । काठमाडौंको भृकुटीमण्डपमा सुरु अधिवेशनबाट चुनिने नेतृत्वबारे पनि त्यतिकै चर्चा र बहस सुनिन थालेको छ ।
वाग्मती प्रदेशको नेतृत्वलाई एमालेभित्र पनि निकै महत्वका साथ हेरिएको छ । प्रदेशहरुमा सकेसम्म सर्वसम्मत नेतृत्व चयन गर्ने बताएको थियो । तर लुम्बिनी प्रदेशमा दुईवटा प्यानलै बनाएर चुनाव भएपछि त्यसको प्रभाव बागमतीमा पनि परेको छ ।
बागमती प्रदेश अधिवेशनमा अहिलेसम्म बागमतीमा प्रष्ट गुट बनिसकेको छैन । तर भावी नेतृत्वका लागि पोलिट्ब्युरो सदस्यद्वय गोकुल बास्कोटा र महेश बस्नेतले अघोषित रुपमा आ–आफ्ना उम्मेदवार मैदानमा पठाउन लागेकाले यहाँ पिन गुटबन्दी देखिने भएको छ ।
काभ्रेका बास्कोटाले आफ्नो समूहबाट अध्यक्षका लागि मकवानपुरका कृष्णप्रसाद दाहाललाई मैदानमा उतार्दै छन् भने भक्तपुरका बस्नेतले अध्यक्षमा रामेछापका कैलाश ढुंगेललाई उतार्न लागेका छन् ।
दाहालको समूहबाट उपाध्यक्षमा धादिङका भूमी त्रिपाठी र ललितपुरका नवराज सिलवालमध्ये एकजना उम्मेदवार हुने देखिएको छ भने ढुंगेलको समूहबाट उपाध्यक्षमा भने चितवनका दावादोर्जे लामा चुनाव लड्दैछन् ।
अध्यक्षकै लागि नुवाकोटका नेता एवम् अहिलेको प्रदेश अध्यक्षसमेत रहेका केशव पाण्डे, दोलखाकी नेतृ रचना खड्का र काठमाडौंका सानुकुमार श्रेष्ठलगायत थुप्रै नेताको नाम चर्चामा छ । तर अन्तिममा चुनावै हुने अवस्थामा दाहाल र ढुंगेल नै मैदानमा हुने सम्भावना रहेको नेताहरू बताउँछन् ।
