कुश्माण्ड सरोवर त्रिवेणी धाममा माघ महिनाभर लाग्ने एक महिने मेलाको तयारी तीव्र रूपमा भइरहेको छ ।
हरेक वर्षझैँ यस वर्ष पनि पुस मसान्तदेखि माघ मसान्तसम्म एक महिने मेला लाग्दै छ । एक महिनासम्म कथावाचन तथा प्रवचनका साथै दैनिक हवन, तर्पण र भागवत, वेद, रुद्री, गीताको पाठपारायण हुने कार्यक्रम रहेको त्रिवेणीधाम विकास समितिका अध्यक्ष ईश्वरीप्रसाद न्यौपानेले बताउनुभयो ।
यस वर्ष डा. माधवप्रसाद भट्टराई, पण्डित कुवेर सुवेदी, गोपालप्रसाद चालिसेबाट विशेष दिनहरूमा प्रवचन हुने कार्यक्रम रहेको छ । यसैगरी पण्डित यदु अधिकारी, मनिषशरण खनाल, जीवराज बख्रेलबाट पनि कथा प्रवचन हुने कार्यक्रम रहेको छ ।
प्रवचन दिउसो १२ः३० बजेबाट ३ः३० बजेसम्म हुने र साँझ ७ः३० बजेदेखि राति १० बजेसम्म महात्म्य, तथा भजनकीर्तन हुने कार्यक्रम रहेको छ । माघको २८ गते लक्षवर्ती दीप प्रज्ज्वलन र २९ गते तिलार्चन सहित कार्यक्रम समापन गर्ने कार्यक्रम रहेको छ ।
मेलाको तयारीस्वरूप अहिले धाममा रङ्गरोगनको काम भइरहेको छ । यसैगरी भान्साघर निर्माणको काम पनि अन्तिम चरणको पुगेको छ भने नयाँ शौचालय पनि निर्माण भइरहेको छ ।
