हेटौँडा उपमहानगरपालिका वडा नम्बर १० कर्रामा फुटबल मैदान निर्माण सुरू भएको छ । कर्रा खोला नजिकै झाडीका रूपमा खेर गइरहेको जग्गालाई सदुपयोग गर्दै खेल मैदान निर्माण गर्न लागिएको हो ।
सो झाडी धेरै युवाहरू लागू पदार्थ सेवन गर्ने थलो बनेकाले कुलतमा लागेको युवाहरूलाई सही बाटोमा ल्याउन झाडी सफा गरी मैदान निर्माण गर्न लागेको बताइएको छ ।
वडा सदस्य विमल लामा र नमुना टोल विकास संस्थाका अध्यक्ष सन्तकुमार लामाको पहलमा सो मैदान निर्माण हुन लागेको हो । फुटबल मैदान बन्न लागेको जमिन करिब १ बिगाहा १० कठ्ठा रहेको बताइएको छ ।
ग्राउन्ड बनेपछि क्लब दर्ता गरेर युवाहरूलाई कुलतबाट बचाउन फुटबल प्रशिक्षण दिइने र प्रशिक्षकमा भीम लामा रहने बताइएको छ ।
ग्राउन्ड निर्माणपछि मर्निङ वाकका लागि हुप्रा चहुर धाउनुपर्ने अवस्थाको पनि अन्त्य हुने वडा सदस्य लामाले बताउनुभयो ।
Good job