धरानस्थित बीपी कोइराला स्वास्थ्य विज्ञान प्रतिष्ठानका कायममुकायम उपकुलपति प्रा.डा प्रल्हाद कार्कीको कार्यकक्षमा मेयर हर्कराज साम्पाङले तालाबन्दी गरेका छन्।
उपमेयर आइन्द्र विक्रम बेघासंग विवादमा परेका मेयर आफै मोटरसाइकल लिएर प्रतिष्ठान पुगेका थिए। आफै विवादको भूमरीमा पर्दै आएका मेयर साम्पांगले प्रतिष्ठानमा विवाद बढ्दै गएको र शिक्षक कर्मचारी चिकित्सकको माग सम्बोधन गर्न उपकुलपतिले नसकेको जनाउँदै तालाबन्दीमा उत्रिएका हुन्। कार्यकक्षमा ताला लगाउदै मेयर साम्पाङले उपकुलपतिको कक्षमा तालाबन्दी गरेपछि अरु कसैले खोल्ने आँट नगरुन र आवश्यक पर्दा ताला आफैँ खोल्न आउने प्रस्टाएका थिए।
यसअघि, बढुवा प्रक्रिया अघि बढाउन नसकेको जनाउँदै प्रतिष्ठानमा कार्यरत शिक्षक कर्मचारी चिकित्सकले आइतबारबाट बहिरंग सेवा ठप्प बनाएका छन्।
अर्कोतर्फ कायममुकायम उपकुलपति प्राडा. कार्कीले रजिष्ट्रार प्राडा.सूर्यप्रसाद संग्रौलालाई आन्तरिक, वाह्य पत्राचार र मुद्धा मामिलासम्बन्धी कार्य हेर्न नपाउने गरी अधिकार खोसेका छन्। उपकुलपति कार्कीले आइतगर्दै रजिष्ट्रार संग्रौलालाई प्रदान गरिएको अख्तियारी फिर्ता गरिएको जनाएका छन्।
