नेपाली काँग्रेसका सहमहामन्त्री बद्रीप्रसाद पाण्डेले नेपाल शिक्षक संघमा आवद्ध शिक्षकहरूले मन, वचन र कर्मले आफ्नो पेशाप्रति इमानदार हुनुपर्ने बताउनुभएको छ । हेटौँडामा आज आयोजित एक कार्यक्रमलाई सम्बोधन गर्दै सहमहामन्त्री पाण्डेले नेपाल शिक्षक संघमा आवद्ध शिक्षकहरूले पार्टीको झन्डा बोकेर हिँड्नु नपर्ने र निर्वाचनका बेलामा भोट माग्दै पनि हिँड्नु नपर्ने भन्दै आफ्नो कर्ममा इमानदार र लगनशील भए पार्टीका लागि भोट मागेको र दिए सरह हुने बताउनुभयो ।
नेपाल शिक्षक संघ मकवानपुरको प्रतिनिधिसभामा प्रमुख अतिथि रहनुभएका पाण्डले हरेक क्षेत्रका मानिस आफ्नो कर्ममा इमानदार हुनुपर्ने बताउनुभयो । उहाँले भन्नुभयो, “अहिले सांसदहरूले आफ्नो काम र कर्तव्य छाडेर मिसन ८४ भन्दै हिँडिरहेका छन् । कर्मचारी पनि आफ्नो जिम्मेवारीबाट पन्छिदै छन् । यसले गर्दा देशमा जटिलता निम्तिरहेको छ ।”
उहाँले शिक्षकले मन, वचन र कर्मले आफ्नो पेशाप्रति र विद्यालयप्रति उत्तरदायी हुनुपर्ने बताउनुभयो । अब देश निर्माणको अभियानमा जुट्नुपर्ने बेला आएको भन्दै पाण्डेले भन्नुभयो, “अरूको कुरा काट्न छाडेर जबसम्म आफ्नो कर्तव्य पूरा गर्न मान्छे लाग्दैन तबसम्म देश बन्दैन ।”
यहाँ सबै नेता र सधैँ नेता हुने अवस्थाले बिग्रिएको भन्दै पाण्डेले राजनीति भनेको केहीले गर्ने र केही समय मात्र गर्ने हुनुपर्ने बताउनुभयो ।
प्रतिनिधिसभाको शिक्षा, स्वास्थ्य र सूचना तथा प्रविधि समितिका सदस्यसमेत रहनुभएका पाण्डेले शिक्षकका, अभिभावकका, विद्यालय कर्मचारीका धेरै समस्या रहेको बताउनुभयो । सबैका समस्या समाधान गर्नेगरी शिक्षा विधेयक ल्याउनुपर्ने चुनौति रहेको पाण्डेको भनाइ छ ।
अहिले शिक्षा विधेय ल्याउन धेरै सकस भएको भन्दै उहाँले भन्नुभयो, “स्थानीय, प्रदेश र संघ तीनै तहमा शिक्षाको अधिकारलाई कसरी परिभाषित गर्ने भन्ने समस्या रहेको छ । १ सय ५२ जनाले संशोधन हालेको र १७ सयभन्दा बढी संशोधन परेकोले यी कुरा समेट्न कठिन रहेको छ ।”
अब शिक्षा विधेकका विषयमा सातै प्रदेशमा छलफल चलाउने बारेमा संसदीय समितिमा छलफल चलिरहेको पाण्डेले बताउनुभयो । शिक्षक आन्दोलनका माग र मुद्धालाई संवोधन गर्नेगरी विधेय ल्याउने भन्दै उहाँले राज्य शिक्षकका सम्झौता पूरा गर्न हिच्किचाउन नहुने बताउुभयो ।
शिक्षा क्षेत्रमा योग्य व्यक्तिलाई प्रंवेश गराउन राज्यले वृत्ति विकासमा विशेष ध्यान दिने बताउनुभयो ।
जिल्ला अध्यक्ष गणेशप्रसाद हुमागाइँको अध्यक्षतामा भएको कार्यक्रममा नेपाल शिक्षक संघका संघीय सदस्य रामकुमार अधिकारीले नेपाल शिक्षक संघले मात्र शिक्षकका माग मुद्धालाई संवोधन गर्ने सक्ने बताउनुभयो । अहिले शिक्षक संघप्रति शिक्षकहरूको आकर्षण बढेको भन्दै यसलाई जीवन्त राख्ने गरी शिक्षक संघले काम गर्ने बताउनुभयो ।
कार्यक्रममा नेपाली काँग्रेसका जिल्ला सभापति बुद्ध लामा, उपाध्यक्ष आनन्द कठायत, सचिव ईश्वर पाठक, पूर्व सभापतिहरू रघुरमण न्यौपाने, माइकल रामचन्द्र अर्याललगायतको आतिथ्यता रहेको थियो ।
