हेटौँडा उपमहानगरपालिका वडा नम्बर ९ कार्यालयले प्रगति माविबाट एसइई परीक्षामा ४ जिपिए ल्याएर उत्तीर्ण हुने विद्यार्थीलाई दश हजार रुपियाँ पुरस्कार दिने भएको छ ।
विद्यालय व्यवस्थापन समितिको बैठकका क्रममा वडाध्यक्ष शुकराम केसीले यस्तो घोषणा गर्नुभएको हो । उहाँले प्रगति माविबाट ३ दशमलव ६१ देखि माथि ल्याउने विद्यार्थी सबैलाई पुरस्कार स्वरुप नगद पाँच हजार रुपियाँ दिने पनि बताउनुभएको छ ।
विद्यार्थीलाई पठनपाठनमा प्रोत्साहन गर्नका लागि यो पुरस्कारको घोषणा गरिएको वडाध्यक्ष केसीले बताउनुभयो । प्रगति माविबाट गत वर्ष एसइई उत्तीर्ण गरेका हेटौँडा ९ नम्बर वडा स्थायी बसोबास भएका विद्यार्थीलाई कक्षा ११ मा अध्ययन गर्नका लागि ५० प्रतिशत छात्रवृत्ति उपलब्ध गराइरहेको पनि वडाध्यक्ष केसीले बताउनुभयो । प्रगति माविमै अध्ययन गर्ने विद्यार्थीहरूलाई वडा कार्यालयले छात्रवृत्तिसमेत प्रदान गरिरहेको छ ।
यस वर्ष प्रगति माविमा कक्षा १० मा १ सय १९ जना विद्यार्थी अध्ययनरत रहेको प्रधानाध्यापक किशोर पराजुलीले बताउनुभयो । यस वर्षको एसइई परीक्षामा सकेसम्म धेरै विद्यार्थीलाई उत्तीर्ण गराउने लक्ष्यका साथ नयाँ योजनाका साथ पठनपाठन तीव्र पारिएको पनि प्रधानाध्यापक पराजुलीले बताउनुभयो ।
