प्रगति माविमा व्यावसायिक भवन तथा प्राङ्गण स्तरीकरणको काम हुँदै

हेटौँडा ९ स्थित प्रगति माविमा व्यावसायिक भवन निर्माण तथा विद्यालयको प्राङ्गण स्तरीकरणको काम भइरहेको छ । स्थानीय तथा प्रदेश सरकारको आर्थिक सहयोगमा यी कामहरू भइरहेका हुन् । 

वाग्मती प्रदेश समाजिक विकास मन्त्रालयको १० लाख रुपियाँ बजेटमा विद्यालय प्राङ्गणमा इन्टरलक लगाउने काम भइरहेको छ । गत वर्ष पनि प्रदेश सरकारको सहयोगमा विद्यालय प्राङ्गणमा इन्टरलक लगाइएको थियो । त्यति वेला अधुरो रहेको इन्टरलक लगाउने काम यसवर्ष पूरा गर्न लागिएको विद्यालय व्यवस्थापन समितिका अध्यक्ष प्रदीप पराजुलीले बताउनुभयो । साथै प्रदेश सरकारकै सहयोगमा दुई ओटा कोठा बनाउने काम पनि हुने भएको छ । 

यसैगरी हेटौँडा उपमहानगरपालिकाको आर्थिक सहयोगमा विद्यालय अगाडि रहेको एक कठ्ठा १० धुर जग्गामा व्यावसायिक भवन निर्माण सुरू भएको छ । हेउमनपाको २५ लाख रुपियाँ बजेटमा ९ कोठाको व्यावसायिक भवन निर्माण भइरहेको हो । 

सो भवनको जगसम्मको काम गत आर्थिक वर्षमा नै सम्पन्न भएको थियो । 

तिन तलाको भवन निर्माण गर्ने लक्ष्य भए पनि यस वर्ष पहिलो तलाको काम सम्पन्न गर्ने लक्ष्य रहेको समितिका अध्यक्ष प्रदीप पराजुलीले जानकारी दिनुभयो । 

आगामी वैशाखसम्ममा भवन निर्माण सम्पन्न गरेर सटरहरू भाडामा लगाउने उहाँले बताउनुभएको छ । सो निर्माण गरी भाडामा दिएपछि विद्यालयलाई आर्थिक रूपले सहयोग पुग्ने अध्यक्ष पराजुलीले बताउनुभयो । कक्षा नर्सरीदेखि १२ सम्म अङ्ग्रेजी माध्यममा सञ्चालित विद्यालयमा सरकारी दरबन्दीबाहेक १० जना निजीस्रोतका शिक्षकहरू रहेका छन् ।