गणेश माविमा भूकम्‍प सुरक्षा सम्‍बन्‍धी सडक नाटक प्रदर्शन

Nigarani Online 318+ समाचार ( )
२३ माघ २०८०, मङ्गलबार

शशी खड्का

बुढानीलकण्‍ठ नगरपालिका वडा नं. २ चपलीमा अवस्‍थित गणेश माध्‍यमिक विद्यालयमा भूकम्प सुरक्षा सम्‍बन्‍धी सचेतनामूलक सडक नाटक प्रदर्शन गरियो ।

केन्‍द्रीय सरकार र बुढानीलकण्‍ठ नगरपालिकाको आर्थिक सहयोग, नगरपालिकाको समन्‍वय तथा प्रस्‍तुति रहेको उक्‍त सडक नाटकको संयोजन आयुष्‍मान कन्‍सल्‍टेन्‍सीले गरेको थियो ।

विष्‍णु गैरेको निर्देशनमा रामचन्‍द्र अधिकारी (काजी बा), राजु श्रेष्‍ठ, सुरेश असीम र दीपिका थापाले भूकम्‍प प्रतिरोधी भवन निर्माण, झटपट झोला, भवन निर्माण संहिता र भूकम्‍प आउँदा अपनाउनुपर्ने सावधानीका विषयमा नाटक प्रस्‍तुत गर्दा विद्यार्थीहरू गम्‍भीर भएका थिए ।

विद्यालयमा अध्‍ययनरत करिब आठ सय विद्यार्थी र शिक्षकको उपस्थितिमा प्रदर्शन गरिएको उक्‍त नाटक बुढानीलकण्‍ठ नगरपालिका भित्र रहेका ११ सामुदायिक विद्यालयमध्‍ये दशओटा विद्यालयमा प्रदर्शन गरिने जानकारी कलाकार राजु श्रेष्‍ठले दिनुभयो । उहाँले विद्यालयमा नाटक प्रदर्शन गर्नुको उद्देश्‍य विद्यार्थीका माध्‍यमबाट उनीहरूको घरपरिवार, छरछिमेक हुँदै समाजमा भूकम्‍पबाट सुरक्षित हुन केकस्‍ता विषयमा सावधानी अपनाउनुपर्छ भन्‍ने जानकारी पुर्‍याउनु रहेको बताउनुभयो ।

कार्यक्रम सन्देशमूलक र जनचेतनामूलक भए पनि एउटा सानो अस्‍थायी घर बनाएर भत्काई झटपट झोलाको प्रयोग देखाइएको भए अझ प्रभावकारी हुने र आगामी दिनमा यस्‍ता कार्यक्रम आयोजना वा प्रदर्शन गर्दा विद्यालयलाई केही समय अगाडि नै जानकारी दिए विद्यार्थीको व्‍यवस्‍थापन गर्न सजिलो भई कार्यक्रम अझ व्‍यवस्‍थित गर्न सकिने शिक्षक प्रतिभा पाण्‍डेले बताउनुभयो ।

उहाँले विद्यार्थीलाई कलाकारसँग साक्षात्‍कार गराई सम्‍मान गर्ने समय पनि नपाएको गुनासो गर्नुभयो ।

प्रतिक्रिया

शशी खड्का २३ माघ २०८०, मङ्गलबार

धन्यवाद सर!

ताजा समाचार

सबै







ट्रेन्डिङ

सबै







सम्बन्धित समाचार