विद्यालयस्तरीय खुल्ला नकआउट फुटबल प्रतियोगितामको दोस्रो दिनको खेलमा वंश गोपाल माध्यमिक विद्यालय, हेटौंडा–६ ले मनहरी स्थित भोजसिद्ध माध्यमिक विद्यालयलाई ४–३ गोलअन्तरले पराजित गरेको हो । भोजसिद्ध माविको तर्फबाट विशाल गुरुङले पहिलो हाफको ७ मिनेटमा १ गोल र वंश गोपालको तर्फबाट सन्देश चौलागाईले दोस्रो हाफको ४८ औं मिनेटमा १ गोल गरी बराबरी भएको खेलमा पेनाल्टीमा वंश गोपालको तर्फबाट ४ गोल र भोजसिद्धको ३ गोल भएको थियो । वंश गोपालका गोल रक्षक विकेश राई म्यान अफ द म्याच भएका छन् ।
प्रतियोगितामा २९ वटा विद्यालयको सहभागिता रहेको छ । प्रतियोगिताको उपाधी विजेता टिमले ५० हजार रुपैयाँ र उपविजेता टिमले २५ हजार रुपैयाँ सहित शिल्ड, मेडल तथा प्रमाणपत्र प्राप्त गर्नेछन् भने विधागत उत्कृष्ट खेलाडीहरुका लागि समेत विशेष पुरस्कारको व्यवस्था गरिएको छ । प्रतियोगिताको फाइनल खेल असोज २७ गते हुने आयोजकले जनाएको छ ।
